Apaixonados polas tradicións: o magosto.

«Por san Martiño faise o magosto con castañas asadas e mosto», di o refraneiro galego.

O pasado luns celebrouse no colexio o magosto coas tradicionais castañas asadas, que puideron ser degustadas mentres os xogos populares cobraban vida grazas á coordinación do alumnado de 2ºESO.

A música tradicional tamén estivo presente grazas aos «pipas» que, coa súa escolla das pezas musicais máis representativas da mesma, conseguiron conectarnos coa enxebreza e co latexo propio da nosa terra.

Os nosos costumes forman parte de nós, constitúen a nosa identidade e singularidade como pobo, por iso cremos que deben formar parte tamén das vivencias da nosa rapazada no colexio. O alumnado de 2ºESO traballou os xogos tradicionais na materia de EF e na festa do magosto ensinaron ao resto do alumnado a xogar á buxaina, á corda, á mariola, á petanca…

A fría tarde de outono foi un pouco menos fría grazas ás castañas asadas que puidemos degustar e que serviron para repoñer forzas antes de tirar da corda, demostrando que moitas veces vale máis maña que forza.

O magosto é unha festa de orixe pagá relacionada coas castañas e que, ao cristianizarse, tamén se empezou a relacionar cos santos e os defuntos, por iso é polo que se celebra principalmente nas datas próximas ao día 1 de novembro. Ten elementos dos rituais celtas como son o lume e a coincidencia coa fin do verán.

Tamén, segundo crenzas antigas, a castaña era como un símbolo de ánima dos defuntos, na que cada castaña era considerada unha alma liberada do purgatorio. Ao finalizar a festa, as almas viñan quentarse ás brasas das fogueiras, por iso se recomendaba deixar castañas para as ánimas.

Desfrutamos dunha xornada de convivencia amosando paixón polas nosas tradicións.

Dejar un comentario

Tu dirección de correo electrónico no será publicada. Los campos obligatorios están marcados con *