O alumnado de 3º ESO rematou o seu primeiro traballo vinculado co Proxecto de Centro, “POR UN MEDIO DE VIDA”.
A través da proposta ReciclARTE da materia de EPVA, a rapazada transformou papelería de refugallo en material artístico, ao convertilo en soporte para útiles pictóricos e técnicas gráfico-plásticas variadas.
Periódicos, embalaxes alimentarios, cartóns e moitos apuntes de clase antigos serviron para dar vida a dous productos artísticos traballados de xeito cooperativo.
Este curso 24-25 reinterpretamos duas obras de Frida Kalho e Boticcelli, “Autorretrato” e “O Nacemento de Venus”, dous cadros que nos permitiron traballar a imaxe feminina o longo da historia da Arte.
Despois da boa experiencia recollida o curso pasado co Guernica de Picasso, retomamos este ano o proxecto de crear de forma conxunta unha obra pictórica. Dividimos cada un dos cadros en seis partes, creamos plantillas que permitían traballar o debuxo de xeito rápido no sempre complicado formato A3. A rapazada elaborou bases de papel e cartón, creando textura e relevo. Unha vez feitas esas bases co material reciclado experimentaron materiais e técnicas variadas para aplicar a cor.
Finalmente fusionaron cada un dos fragmentos para obter unha reinterpretación moi especial dos dous cadros.
